i l'est pas core chinq heures, déhors i fait core nuit, eune à eune toutes ché lampes y s'alleument autour de ch'puit. L'heure qu'alle a tant ardoutée, alle le vot arriver. Es n'infant i dort cor, alle s'in va l'réveiller. Avant d'ouvrir l'porte, alle intind eune tiote voix. Ech gamin i a compris, es maman alle est là. L'matinée là, sur'mint i s'in rappellera tout l'temps. i est haut comme tros peimmes, i n'a pas cor quinze ans.
Sin p'tit nez s'est pinché, ses yux i sont rougis. Nan, ch'tiot i a pas brait, mais il a mal dormi. i l'a vu tout passer, tout a tourné din s'tête, cha a tourné sur'mint pu vite que les molettes. Es maman alle est là, tout à l'intour ed'li. Pour l'première fos de s'vie, i va quitter sin nid. i sait à peine voler, il li faudrot quéquin, sin papa n'est plus là pour li l'printe par la main.Alle l'imbrasse cor eune fos, alle le serre sur sin coeur : min tiot i faut partir, té vos i va ête l'heure, ché mineurs i s'in vont. i vont t'accompagner, avec eusses n'ai pas peur, i n'y ont tertous passés.
Es'tiote barrette sus tête, es musette à sin dos, avant d'rinter din l'cache, i soupire un grand cop. ses pétites mains sont moites, sin péti coeur i bat, dins in pétit moment i sera tout in bas. Alors comme un éclair toute s'jeunesse alle arpasse. i s'arvot sus ché bancs quand il étot in classe. i pinse à sin papa, sin pépé, sin papi. Pour faire ech dur labeur, i n'y ont laiché leu vie.
Avec deux gros yux ronds comme un p'tit cat poursuit, i tersaute à chaque cop qu'cha buque autour d'li. i baisse bin s'pétite tête, i va butter ses pieds, i li faudra longtemps pour apprinte ch'métier. Et cha va ête comme cha pindant l'pu dure journée. Quand briquet i viendra, cha n'voudra pas passer. Sin bout'lot, ses tartines, i resteront din s'musette, pour sin p'tit frère in haut, cha s'ra ch'pain d'alouette.
A mitan arlavé, aved deux grosses lunettes, i traverse ch'coron comme eun'poute d'escampette. Jamais autant dé s'vie, i a aimé es maman. Alle est là qu'alle attind, d'pusch'matin in tremblant. i queur eune dernière fos, il li saute à sin cou, alors deux grosses élarmes queurtent sus leurs joues. Et pi tout in frémichant, s'blotichant sus sin coeur, i lit dit calmemint : " Maman, j'ai pas eu peur ! ".
Conte d'Isaïe Lampin, poête patoisant de Souchez, ancien mineur ( 1927-2007 ).