Aclot tout oute
Pou in moncha dè poûsse-pou-tchîr, d’ayêr ou d’asteûr,
Poûrter Nivèle à spale yè daler l’moustrer ayeûr,
Ça n’vût pus rin dire du tout.
Fé des dèstoûrs dè vint lieûes pou vîr no bia Nivèle,
Ès pourmèner al Dodin.ne ou bin dins nos ruwèles,
Ça n’vût pus rin dire du tout.
Pou ces djins-là, pârler ’l lanke dè leûs ratayons,
Ou bin minme dè n’impoûrte èlkél des patwès walons,
Ça n’vût pus rin dire du tout.
Mins pour mi ... Rin qu’èrwétî ’m cousse Djan dins ’s vî clokî,
C’est mète mes îs yuskè mes tayons ont mins leûs îs,
Èyè ça, c’est pus bia qu’tout.
Fé ’l toûr du martchi yè monter les vint-kate apas,
C’est mète mes pas yuskè mes tayons ont mins leûs pas,
Èyè ça, c’est pus bia qu’tout.
Bate ène boune dèvisse avè Manu in franc walon,
C’est tchanter tous les mots qu’ont tchanté nos tayons,
Èyè ça, c’est pus bia qu’tout.
Mins vous autes qu’astez come mi, vos avez comprins, djè m’d’è doute,
Què djè sûs né rûwe des Brasseûs yè què dj’sûs Aclot tout oute,
Èyè ça... C’est pus foûrt què tout.
Rawoul Degauquier Nivèle, jwin 1995.
AB CD F
