Sniedersberg (Nederlands: Snijdersberg),
ouch waal de Piemelehook geneump, ies 'n buurtsjap van Gäöl in de gemeinte Meersje in Nederlands Limburg. 't Plaetske liek op 'ne heuvel, ten noordoaste van Gäöl, bie 't Sjtómmeveldsje en ten zuje van De Husjeberg. De naam de Piemelehook zou óntsjtange zin wie oats lange tied allein mer jungskes woorte gebore in de buurtsjap; de oarsjprónkelike naam waor D'n Hook.
De Sniedersberg ies ouch de naam van de helling die nao de beboewde kómp van 't buurtsjepke löp. Dit ies 'n bekènde beklumming bie fietsrennersj; ze haet 'n gemieddeld sjtiegingspercentaasj van 11%.
Aan de Cruisboomsjtraot, riechting Baek, tösje De Husjeberg en Sniedersberg, liek 'n kapelke oet 1960 dat gewiejd ies aan Maria van Sjerpenheuvel. In 1994 ies ze herboewd bie 'n weegrenovatie. 't Kapelke ies eder jaor rösaltaar in de brónk van Gäöl. Neve de kapel sjteit 'n weegkruus.
Op de Sniedersberg woort in 1866 'n waterpöt aangelag, es drinkwaterveurzening, sjuus wie in Mwórveld en De Husjeberg. Allein de pöt van Sniedersberg ies nao de Twiede Waereldoorlog behouwe gebleve.
Ónder aan de Sniedersberg lik ouch 'n watermeule, de lètste herboew dateert oet 1878.