St Thomas-kyrkja
Hentet fra plakat ved kirken:
"I meir enn 1000 år har ein av dei viktigaste ferdselsvegane
mellom aust- og vestland gått over Filefjell. Like etter at
kristendommen kom til Noreg, vart det reist ei lita stavkyrkje i
Smeddalen på Filefjell, attmed denne ferdselsvegen. I dette
dalføret var det kanskje fast busetting i riktig gamal tid, det er
funne restar av gravhaugar og jernvinner her, og som namnet fortel,
skulle dei som budde her vore smedar.
Ein veit lite om bruken av kyrkja før reformasjonen, men tidleg
på 1600-talet vart kyrkja sett i stand og teken i bruk att til
gudstenester.
Syftesok, 2. Juli, var fast messedag i St Tomaskyrkja. Kyrkja
fekk no ry for å vere ei lovekyrkje med undergjerande kraft, og ho
vart etterkvart landskjend for dette. På syftesokdagen strøymde
folk til frå nær og fjern. Sjuke kom for å få legedom, syndarar for
å gjere bot, men dei fleste kom nok for å vere med på det store
stemnet. Her var det kjøp, sal, dans, drikk og slagsmål, og
følgjande ”gjetord” gjekk om dette stemnet: ”Her vart mang ein god
hest sprengd, mang ein sprek kar dengd og mang ei ven møy krenkt”.
Kyrkja sine folk såg ikkje med blide auge på dette. Fleire kravde
at kyrkja måtte rivast, og i 1808 vart kyrkja nedriven og seld på
auksjon.
Men den folkekjære kyrkja på Filefjell vart aldri gløymd. Mange
arbeidde for å få reist ei ny St Tomaskyrkje. I juli 1971 sto
endeleg den nye kyrkja ferdig, og ein kunne på ny høyre
Tomasklokkeklangen på Kyrkjistøle."